ပြီးပြည့်စုံမှု
အပြည့်စုံဆုံးအခြေအနေကိုရဖို့အတွက် မနေမနားကြိုးစားနေတာမျိုးဟာ ကိုယ့်ကိုယ်ဒုက္ခပေးနေတာပါပဲ.... အရာရာပြီးပြည့်စုံတယ်ဆိုတာ ဘယ်တော့မှမရှိပါဘူး... ဘာကြောင့်လဲဆိုတော့ လူသားတွေရဲ့ အလိုဆန္ဒတွေဟာ ဘယ်တော့မှ အဆုံးမရှိလို့ဖြစ်ပါတယ်.... မိမိလိုချင်တဲ့ တစ်စုံတစ်ခုကို ရရှိပိုင်ဆိုင်ပြီးတဲ့အခါမှာ နောက်ထပ် လိုချင်တာတွေ၊ ဖြစ်ချင်တာတွေ ဆက်တိုက်ဆက်တိုက်ဖြစ်ပေါ်လာဦးမှာပါပဲ... ဒါကြောင့် လူ့အလို နတ်မလိုက်နိုင်လို့တောင် ဆိုကြပါတယ်...
အပြည့်စုံဆုံးဘဝဖြစ်အောင် ကြိုးစားနေသူတွေဟာ ကိုယ့်အမြီးကိုယ်လိုက်ဟပ်နေတဲ့ ခွေးတစ်ကောင်လိုပါပဲ... မိမိရဲ့အလိုဆန္ဒနောက်ကို အသည်းအသန်လိုက်နေပေမဲ့ ဘယ်တော့မှ အဆုံးမရှိ၊ ဆန္ဒမပြီးမြောက်ပဲ ပင်ပန်းခြင်းတွေသာ အဖတ်တင်နေပါလိမ့်မယ်... ပြီးပြည့်စုံမှုဆိုတာ ဘယ်တော့မှမရှိတဲ့အရာဖြစ်ပါတယ်... မိမိအနေနဲ့ အမြင့်မားဆုံး၊ အကောင်းမွန်ဆုံးအခြေအနေတစ်ရပ်ကို မျှော်မှန်းကြိုးစားခဲ့ပေမဲ့ အဲ့ဒီအခြေအနေကိုရောက်လာတဲ့အခါမှာ ဒီထက်မြင့်မားကောင်းမွန်တဲ့အခြေအနေတွေက မိမိကိုကလူကျီစယ်နေတာတွေ့ရပါလိမ့်မယ်... တစ်တောင်ထက်မြင့်တဲ့ နောက်တစ်တောင်ဟာ အမြဲတမ်းရှိနေဦးမှာဖြစ်ပါတယ်...
ဘဝဟာ အကောင်းနဲ့အဆိုး ရောပြွန်းနေတဲ့ နေရာတစ်ခုဖြစ်ပါတယ်... ဒါကို သင့်အနေနဲ့ လက်ခံထားဖို့လိုပါတယ်... ပြီးပြည့်စုံမှုနောက်ကို အာသာပြင်းပြင်းလိုက်နေခြင်းဟာ သင့်ရဲ့အောင်မြင်မှုကိုပါ ထိခိုက်စေနိုင်ပါတယ်... ရရှိ၊ ရောက်ရှိနေတဲ့နေရာကို မကျေနပ်မတင်းတိမ်နိုင်ဘဲ ဒီထက်ပြီးပြည့်စုံမယ့် အခြေအနေနောက်ကိုလိုက်နေခြင်းဟာ အဆုံးမရှိတဲ့ လမ်းကို လျှောက်လှမ်းနေခြင်းသာဖြစ်ပါတယ်... မိမိအောင်မြင်မှုကို အသိအမှတ်မပြုနိုင်ဘဲ အတောမသတ်နိုင်တဲ့ လိုအင်ဆန္ဒတွေကြောင့် စိတ်ပိုင်း၊ ရုပ်ပိုင်းဆိုင်ရာတွေပါထိခိုက်စေနိုင်ပါတယ်... မိမိကိုယ်ကို ယုံကြည်မှုလည်း ကျဆင်းစေမှာ ဖြစ်ပါတယ်...
ဖြစ်ချင်တာ၊ လုပ်ချင်တာတွေအားလုံးကို လုပ်ဖို့အတွက် ဘဝဟာ တိုတောင်းလွန်းပါတယ်.... လူ့ဘဝသက်တမ်းတိုတိုလေးအတွင်းမှာ သင်ဖြစ်ချင်သမျှထဲက တစ်ချို့ကိုပဲ တကယ်တမ်းလုပ်နိုင်ပါလိမ့်မယ်... ဒီလိုဆိုတဲ့အတွက် ရည်မှန်းချက်ကြီးကြီးမထားရှိရဘူးလို့ ဆိုလိုတာမဟုတ်ကြောင်း သတိပြုစေချင်ပါတယ်... ခိုင်မာတဲ့ရည်မှန်းချက်ထားရှိဖို့ဆိုတဲ့အချက်ကို အလေးပေးချင်တာဖြစ်ပါတယ်...
ဥပမာအားဖြင့် ချမ်းသာဖို့ရည်မှန်းထားတဲ့သူဟာ ဘယ်လောက်အတိုင်းအတာအထိ ချမ်းသာချင်တာလဲဆိုတဲ့ ရည်မှန်းချက်မျိုးရှိရပါမယ်... ဒီအချက်က ဘာကြောင့်ချမ်းသာချင်သလဲဆိုတာပေါ်မှာ မူတည်နေပါတယ်... သက်တောင့်သက်သာနေချင်တာလား၊ အလှူရေစက်လက်နဲ့မကွာလှူဒါန်းချင်တာလား... အများရဲ့အထင်ကြီးအားကျမှုကိုလိုချင်တာလား... မိမိလိုလားချက်နဲ့လျော်ညီတဲ့ ရည်မှန်းချက်ကို ချမှတ်ထားရပါမယ်... ဘယ်အဆင့်မှာမဆို မိမိထက်သာတဲ့အခြေအနေတွေရှိဦးမယ်ဆိုတာကိုတော့ လက်ခံထားရပါမယ်...
လောကကြီးဟာ မတူညီမှုတွေ ရောယှက်ထားတဲ့နေရာဖြစ်ပါတယ်.... အနိမ့်အမြင့် အတက်အကျတွေဟာ နေရာတိုင်းမှာ အချိန်နဲ့အမျှ ရှိနေပါတယ်... မိမိရည်မှန်းချက်ပန်းတိုင်ဆီကို အရောက်သွားရာမှာ လက်ရှိအခြေအနေနဲ့ ကင်းကွာနေလို့မရပါဘူး... အမြဲတမ်းအပြည့်စုံဆုံးဖြစ်အောင်ကြိုးစားနေပေမဲ့ အပြည့်စုံဆုံးအချိန်ဆိုတာဟာ ဘယ်တော့မှရောက်လာမှာမဟုတ်ပါဘူး...
မိမိရဲ့ ကြိုးစားအားထုတ်မှုကြောင့် ရရှိလာတဲ့ အောင်မြင်မှုရဲ့အသီးအပွင့်တွေကို ရယူခံစားပါ.... မိမိရရှိ ပိုင်ဆိုင်ထားသမျှနဲ့ ကမ္ဘာလောကကြီးကိုအကျိုးပြုပါ... အလုံးစုံပြီးပြည့်စုံမှုမရှိတဲ့ လောကသဘာဝကို နားလည်လက်ခံထားမှသာ သင့်ရည်မှန်းချက်တွေ အရာထင်ပါလိမ့်မယ်....
----------------------------------------------------------------
#နှိုင်းရင့်နွေ
No comments:
Post a Comment