အလုပ်ဖိစီးမှု
တစ်ခါတစ်လေမှာ ဖိစီးမှုတွေများပြီး ဘာမှလုပ်ချင်ကိုင်ချင်စိတ်မရှိလောက်အောင် စိတ်တွေလေးလံထိုင်းမှိုင်းနေတာမျိုးဖြစ်တတ်ပါတယ်... လုပ်စရာအလုပ်တွေက တစ်ခုပြီးတစ်ခုထပ်တိုးလာတယ်... လုပ်လက်စအလုပ်တွေကလည်း မပြီးသေးဘူး... အလုပ်ကြွေးတွေ တစ်ခုပြီးတစ်ခုပိုလာတယ်... မပြီးသေးတဲ့အလုပ်တွေအတွက် ဖိအားပေးနေတာကိုလည်း ခံနေရတယ်... အဲ့ဒီလိုအခြေအနေမျိုး ကြုံဖူးကြမယ်ထင်ပါတယ်...
အကျိုးဆက်အနေနဲ့ ဘာအလုပ်မှ မလုပ်ချင်မကိုင်ချင်ဖြစ်သွားတယ်... အလုပ်အားလုံးကို ပစ်ပြီး တစ်နေရာကို စိတ်လွတ်ကိုယ်လွတ် ထွက်သွားလိုက်ချင်တယ်... လုပ်ငန်းခွင်ကလူတွေနဲ့ ဆက်ဆံရတာလည်း အဆင်မပြေတော့ဘူး... လုပ်ငန်းခွင်က ဖိစီးမှုတွေဟာ မိမိရဲ့ မိသားစုဘဝကိုပါ ထိခိုက်လာမယ်... စိတ်တိုလွယ်၊ စိတ်ဆတ်လွယ်၊ ဒေါသဖြစ်လွယ်တယ်... တခြားသူတွေအပေါ်မှာလည်း အမြင်မကြည်ဘူး... ကိုယ့်ကိုချည်း ဖိခိုင်းနေတယ်ဆိုတဲ့အမြင်မျိုးမြင်လာမယ်...
တကယ်တော့ လုပ်ငန်းခွင်အဆင်မပြေမှုတွေဟာ ရှောင်လွှဲလို့မရတဲ့ ကိစ္စတွေဖြစ်ပါတယ်... အလုပ်လုပ်သူတိုင်း အချိန်နဲ့အမျှကြုံတွေ့နေရတဲ့ စိန်ခေါ်မှုတွေလည်းဖြစ်တယ်... ဒီကနေ့ခေတ်လို အပြိုင်အဆိုင်များတဲ့ ကာလမျိုးမှာ အဲ့ဒီစိန်ခေါ်မှုတွေကို မှန်မှန်ကန်ကန်မဖြေရှင်းနိုင်ရင် မိမိရဲ့ လုပ်ငန်းခွင်၊ မိသားစုဘဝတို့မှာသာမက မိမိအနာဂတ်ရည်မှန်းချက်ပန်းတိုင်ကိုပါ ယိမ်းယိုင်ထိခိုက်စေနိုင်မှာဖြစ်ပါတယ်...
အလုပ်ရဲ့ ဖိစီးမှုကို ခံစားနေရတဲ့သူတွေအတွက် အခုဖော်ပြပေးမယ့်အကြံပြုချက်လေးတွေက ထိထိရောက်ရောက် အထောက်အကူပေးနိုင်မယ်လို့ အာမခံပါတယ်... မိမိလုပ်ကိုင်တဲ့ လုပ်ငန်းအပေါ်မှာမူတည်ပြီး သဘောသဘာဝအားဖြင့်မတူညီပေမဲ့ အလုပ်ပေါ်ထားရှိမယ့် မိမိရဲ့သဘောထားကို ပြုပြင်ပြောင်းလဲနိုင်ဖို့အတွက် ဒီအချက်လေးတွေက သင့်ကိုကူညီပါလိမ့်မယ်...
၁) လုပ်စရာရှိသည်များကို စာရင်းပြုစုထားပါ...
----------------------------------------------------------------
အလုပ်ကြွေးတွေဘယ်လောက်များနေလဲ... ဘယ်အလုပ်တွေက အဓိကအရေးတကြီးလုပ်ဖို့လိုသလဲ... ဘယ်အလုပ်အတွက် အချိန်ဘယ်လောက်လိုသလဲ... ဘယ်အလုပ်နဲ့ ဘယ်အလုပ်က တွဲလုပ်လို့ရသလဲ... တစ်ခြားသူတွေနဲ့ပူးပေါင်းလုပ်ကိုင်ရမယ့်အလုပ်တွေက ဘာတွေလဲ... မိမိက တခြားသူတွေကိုကြီးကြပ်လုပ်ဆောင်ရမယ့် အလုပ်တွေရှိသလား... ဘယ်အလုပ်တွေကို ဘယ်အချိန်မှာ အပြီးသတ်ရမလဲ... စတာတွေကို သိရှိစဉ်းစားနိုင်ဖို့အတွက် လုပ်ဆောင်ရမယ့် အလုပ်စာရင်းကို ရေးသားထားဖို့လိုပါမယ်... ဒါမှသာ အလုပ်တွေကို စနစ်တကျစီမံကိုင်တွယ်လုပ်ဆောင်ပြီး အချိန်မီပြီးစီးနိုင်ပါလိမ့်မယ်...
၂) အရေးကြီးတာကစလုပ်...
----------------------------------------------------------------
လုပ်စရာအလုပ်တွေများနေပေမဲ့ တစ်ချို့အလုပ်တွေက တကယ်အရေးမကြီးပါဘူး... တခြားသူတွေရဲ့ ပြီးစီးမှုကို စောင့်ပြီးမှလုပ်ရမယ့်အလုပ်မျိုးတွေလည်း ရှိတတ်ပါတယ်... အချိန်မီပြီးရမယ့်အလုပ်၊ အရေးတကြီးလုပ်ရမယ့်အလုပ်တွေကို ရွေးထုတ်ပြီး အရင်လုပ်ဆောင်မယ်ဆိုရင် ပိုပြီးထိရောက်မှာဖြစ်သလို အရေးမကြီးတာတွေကို ခဏဖယ်ထားတဲ့အတွက် ဖိစီးမှုလည်း တော်တော်သက်သာသွားပါလိမ့်မယ်...
၃) အလုပ်နဲ့ လူမှုရေးခွဲခြားထားပါ....
----------------------------------------------------------------
လူတစ်ချို့က လုပ်ငန်းခွင်က အဆင်မပြေမှုတွေ၊ ဖိစီးမှုတွေကို အိမ်မှာပေါက်ကွဲဖြေရှင်းတတ်ကြပါတယ်... အဲ့ဒီအပြုအမူဟာ မိသားစုဘဝကို ထိခိုက်စေနိုင်ပါတယ်... တစ်ဘက်ကပြန်ကြည့်ရင် မိသားစုဘဝမှာ သာယာမှုမရတဲ့သူဟာ လုပ်ငန်းခွင်မှာလည်း စိတ်အာရုံစူးစိုက်ပြီး လုပ်နိုင်ဖို့မလွယ်ကူပါဘူး... အလုပ်ကိစ္စကို မိသားစုမှာ ပုံချစရာမလိုသလို မိသားစုပြဿနာကြောင့်လည်း မိမိလုပ်ငန်းခွင်ကို မထိခိုက်စေသင့်ပါဘူး... မိသားစုအရေးကြောင့် စိတ်ညစ်ညူးနေရုံနဲ့ မိမိလုပ်ငန်းကိစ္စတွေ ပြီးစီးသွားမှာမဟုတ်ဘူးဆိုတာကို သတိပြုသင့်ပါတယ်...
၎) အလုပ်လုပ်ချင်စိတ်မွေးပါ...
----------------------------------------------------------------
အလုပ်တွေဖိစီးလာတဲ့အခါ ဘာအလုပ်မှ မလုပ်ချင်မကိုင်ချင်ဖြစ်တတ်ပါတယ်... ဒါကြောင့် လုပ်ငန်းခွင်မှာ မရှိနေတဲ့ အချိန်မှာလည်း မိမိရဲ့ အမူအကျင့်တွေကို ဂရုတစိုက်ပြုပြင်ရပါမယ်... မနက်အိပ်ယာထတဲ့အခါ အိပ်ယာကို သပ်သပ်ရပ်ရပ်ဖြစ်အောင်သိမ်းတာမျိုး၊ အိမ်သန့်ရှင်းရေးအလုပ်တွေဝင်လုပ် တာမျိုး၊ အိမ်မှုကိစ္စတွေမှာ ဝင်ကူညီတာမျိုး စတာတွေကို လုပ်ဆောင်သင့်ပါတယ်... ဒီအလုပ်လေးတွေလုပ်တာဟာ စိတ်ကိုအပြောင်းအလဲဖြစ်စေပြီး အလုပ်လေးတစ်ခုပြီးသွားတိုင်း မိမိကိုယ်ယုံကြည်မှုတိုးတက်စေပါတယ်... မသိမသာခိုအောင်းနေတဲ့ အပျင်းစိတ်လေးကိုလည်း မောင်းထုတ်ပြီးသား ဖြစ်သွားပါလိမ့်မယ်...
၅) နားချိန်ထားပါ...
----------------------------------------------------------------
အလုပ်ဘယ်လောက်ရှုပ်နေပါစေ အလုပ်ချည်းပဲ ဆက်တိုက်လုပ်နေဖို့ မဖြစ်နိုင်ပါဘူး... လူရဲ့အာရုံစူးစိုက်မှု၊ ကျန်းမာရေးအခြေအနေ၊ အလုပ်လုပ်ကိုင်နိုင်စွမ်း စတဲ့ ကန့်သတ်ချက်တွေအများကြီးရှိပါတယ်... ဒါကြောင့် အခါအားလျော်စွာအနားယူဖို့လည်း လိုအပ်ပါတယ်... မိမိလုပ်ရမယ့် အလုပ်ပေါ်မူတည်ပြီး သင့်လျော်တဲ့နားချိန်လေးတွေကို သတ်မှတ်ပေးရပါမယ်... အနားယူချိန်မှာ လုံလောက်တဲ့ အိပ်စက်မှုရယူဖို့လိုသလို မိသားစုဝင်တွေ၊ မိတ်ဆွေသူငယ်ချင်းတွေနဲ့ စကားပြောဆိုဖို့လည်းလိုပါတယ်... သီချင်းနားထောင်တာ၊ အလည်အပတ်သွားတာမျိုးတွေကိုလည်း မိမိရဲ့စိတ်အခြေအနေနဲ့ အလုပ်အခြေအနေပေါ်မူတည်ပြီး သီးခြားအချိန်ပေးလုပ်ဆောင်သင့်ပါတယ်... အလုပ်တွေမလုပ်ဘဲ ပစ်ထားလိုက်ရုံနဲ့ ပြဿနာမဖြေရှင်းနိုင်သလို အနားမယူဘဲ ဆက်တိုက်လုပ်တာကလည်း အလုပ်ကိုထိခိုက်စေတယ်ဆိုတာကို သိမြင်နားလည်ထားဖို့လိုပါတယ်....
၆) အပေါင်းအသင်းနှင့် ပတ်ဝန်းကျင်ရွေးချယ်မှု...
----------------------------------------------------------------
နောက်ဆုံးအချက်အနေနဲ့တော့ အပြုသဘောဆောင်တဲ့ အပေါင်းအသင်းများနဲ့ ရွေးချယ်ပေါင်းသင်းဖို့ပါပဲ... အပြုသဘောဆောင်တဲ့ ပတ်ဝန်းကျင်ကိုလည်း ဖန်တီးရပါမယ်... သင့်ပတ်ဝန်းကျင်က လူတွေဟာ သင်လုပ်သမျှကို လှောင်ပြောင်ရှုတ်ချပြီး အပျက်သဘောမှတ်ချက်တွေ၊ အကြံဥာဏ်တွေပေးနေမယ်ဆိုရင် သင့်အနေနဲ့ အလုပ်လုပ်ချင်စိတ် ပျောက်ဆုံးသွားပါလိမ့်မယ်... ဘာသာတရားဘက်ကို တတ်နိုင်သလောက် အချိန်ပေးလုပ်ဆောင်တာ၊ စာကောင်းပေမွန်တွေကိုဖတ်ရှုတာကလည်း စိတ်တည်ငြိမ်အေးချမ်းမှုရစေတဲ့အတွက် ကောင်းတဲ့ပတ်ဝန်းကျင်ကို ဖန်တီးတဲ့သဘောဖြစ်ပါတယ်... အလုပ်ကြိုးစားတဲ့သူတွေ၊ စိတ်ဓာတ်မြှင့်တင်လမ်းညွှန်မှုပေးနိုင်တဲ့သူတွေနဲ့ မကြာခဏပြောဆိုဆက်ဆံသင့်သလို လူမှုကွန်ရက်အလွန်အကျွံသုံးစွဲမှု၊ ဂိမ်းစွဲမှုတွေမဖြစ်အောင်လည်း သတိပြုသင့်ပါတယ်... သင့်ပတ်ဝန်းကျင်ဟာ အလုပ်လုပ်ဖို့ အသင့်လျော်ဆုံးပတ်ဝန်းကျင်ဖြစ်အောင် သင်ကိုယ်တိုင်ရွေးချယ်ပြင်ဆင်ရမှာ ဖြစ်ပါတယ်....
----------------------------------------------------------------
#နှိုင်းရင့်နွေ
No comments:
Post a Comment