အကောင်းဆုံးအချိန်
အမှန်တကယ် အကောင်းမွန်ဆုံးအချိန်ဆိုတာ ဘယ်တော့မှ မရှိတဲ့အရာဖြစ်ပါတယ်... လောကကြီးမှာ ဘယ်အရာမှ စင်းလုံးချောဖြစ်တာမရှိပါဘူး... အလုံးစုံပြည့်စုံနေတာမျိုးမရှိပါဘူး... အားနည်းချက်၊ ချို့ယွင်းချက်များတော့ အနည်းနဲ့အများ ရှိနေတာချည်းဖြစ်ပါတယ်... ဒါကြောင့် အကောင်းဆုံး၊ အသင့်တော်ဆုံးအချိန်ကို ရောက်လာဖို့ ထိုင်စောင့်နေတယ်ဆိုရင်တော့ သင့်ရဲ့အချိန်တွေကို အလကားသက်သက်ဖြုန်းပစ်နေသလိုပါပဲ...
သင့်အတွက်အကောင်းဆုံးအချိန်နဲ့နေရာဟာ သင်လက်ရှိ ရှိနေတဲ့နေရာနဲ့ လက်ရှိအချိန်ပဲဖြစ်ပါတယ်... လက်ရှိအချိန်လောက် ကောင်းမွန်ပြည့်စုံတဲ့အချိန်မရှိပါဘူး... အတိတ်ကအချိန်တွေဟာ ပြီးဆုံးခဲ့ပြီဖြစ်လို့ သင့်အနေနဲ့ ပြုပြင်အစားထိုးလို့မရနိုင်တော့ပါဘူး... အနာဂတ်ကာလက အချိန်တွေကလည်း မရောက်လာ၊ မဖြစ်လာသေးတဲ့အတွက် ဘာမှ ရေရာသေချာမှုမရှိပါဘူး... လက်ရှိအချိန်ကသာ သင့်လိုအင်ဆန္ဒအတိုင်းဆောင်ရွက်နိုင်တဲ့အတွက် အကောင်းမွန် အပြည့်စုံဆုံးအချိန်ဖြစ်ပါတယ်...
နောက်တစ်ချက်က အကောင်းဆုံးအချိန်ကိုစောင့်နေခြင်းဟာ အချိန်ဆွဲခြင်းတစ်မျိုးလည်းဖြစ်ပါတယ်... ဒါမှမဟုတ် ကြောက်ရွံ့ခြင်းတစ်မျိုးလို့လည်းဆိုနိုင်ပါတယ်... အချိန်သင့် အခါသင့်ကို စောင့်နေတာဟာ မပြည့်မစုံဖြစ်မှာကို စိုးရိမ်တဲ့သဘောဖြစ်ပါတယ်... လက်ရှိအခြေအနေကို ရင်မဆိုင်ရဲတဲ့သဘော၊ မိမိရဲ့စွမ်းဆောင်ရည်ကို မယုံကြည်တဲ့သဘောလည်းဖြစ်ပါတယ်... အခြေအနေနဲ့အချိန်အခါကောင်းဆိုတာ စောင့်ဆိုင်းရတဲ့အရာမဟုတ်ပါဘူး...
မိမိရဲ့ ကိုယ်ရည်ကိုယ်သွေးအမှန်ကို ယုံကြည်မှုရှိမယ်ဆိုရင် ဘယ်အချိန်မှာပဲဖြစ်ဖြစ် မိမိအတွက် အခွင့်အရေး အခွင့်အလမ်းတွေကို ဖန်တီးယူနိုင်မှာသေချာပါတယ်... နေ့စဉ်ကြုံတွေ့နေရတဲ့ စက္ကန့်တိုင်း မိနစ်တိုင်းဟာ သင့်ရဲ့ထိန်းချုပ်မှုအောက်မှာရှိနေပြီး သင်ဖြစ်ချင်သမျှ အရာအားလုံးကို လုပ်ဆောင်နိုင်ဖို့ အခွင့်အရေးတွေရှိနေပါတယ်... အကောင်းဆုံးအချိန်ဆိုတာ မိမိရည်မှန်းချက် ပေါက်မြောက်အောင်မြင်အောင်လုပ်ဆောင်နိုင်မယ့် အခါအခွင့်လည်းဖြစ်ပါတယ်...
အခွင့်အခါကောင်းဆိုတာ ဖန်တီးယူရတဲ့အရာဆိုတာကို မြဲမြဲသတိချပ်သင့်ပါတယ်...
----------------------------------------------------------------
#နှိုင်းရင့်နွေ
No comments:
Post a Comment